粤语笑话：我、你、他

2014年07月30日

    好耐以前，有个学生仔读书，先生讲极佢都唔明，经常激到佢嘅先生扎扎跳。

    有一日，先生教“我、你、佢”三个字。佢对嗰个学生仔就话喇：“嗱，呢三个字嘅解法好简单架啫”，先生指住自己就话喇：“我系你嘅先生”；又指住学生仔话：“你系我嘅学生”；再指住另一个：“佢就系你嘅书友，明白未？”嗰个学生仔笑口噬噬咁话：“咁简单，一讲就明啦！”

    放学返到屋企，学生仔嘅老豆就问佢喇啵：“喂，阿仔啊，今日先生教咗乜嘢课俾你吖？”学生仔就话喇：“好简单啫！教三个字——我、你、佢”。然后佢就学正先生咁架款，指住自己就话：“我系你嘅先生”；又指住老豆话：“你系我嘅学生”；再指住老母话：“佢，就系你嘅书友，明白未？”

    呢次撞正大板啦！佢老豆一听恼到头壳顶飙晒烟，指住个仔就大声咁闹：“混你嘅账！乱噏！我系你老豆，你系我嘅仔，佢，系你嘅老母！记住！以后仲系乱噏野呢，我打到你三跳四，明白未？”“明……明……明白啦！”

    明鬼明马咩！嗰个仔俾老豆闹到三魂唔见咗七魂，个心谂：“都唔知先生讲得啱，抑或老豆讲得啱？”佢谂来谂去仲系觉得老豆讲得啱听啲。

    第二日上课喇，先生又问嗰个学生仔喇啵：“你仲记唔记得，噙日教嘅：我、你、佢嘅解法吖？”嗰个学生仔企起身就话喇：“梗系记得啦！咁简单。”佢指住自己就话：“我系你嘅老豆，你系我嘅仔！”又指住另一个女同学话：“佢，就系你嘅老母！”搞到哄堂大笑。